TOP 

Johannes Diekhoff was an 10. Feberwaar 95 Jahr old worden. Hum to Ehren sünd an 13. Feberwaar Minsken in dat Europa-Huus in Auerk tosamenkomen, de mit Johannes sien Levenspadd deelt hebben.
Nöögt harren de Verenen Oostfreeske Taal, Warkkring oostfreeske Schrieverskes un Schrievers un dat Europa-Huus. Overall hett Johannes Diekhoff krachtige Sporen achterlaten.
Diekhoff hett grote Verdennsten um dat Europa-Huus. De Vörsitter Walter Theuerkauf harr overnomen, all de Lüü to begröten. He keek nochmaal torügg up de Levenspadd van Diekhoff. In Gedenken an hum wurr de Plenaar-Saal in dat Haupt-Geboo van dat Europa-Huus in Johannes-Diekhoff-Saal umbenöömt.
Dat is nu mit en Schild kenntekent. Un in de Saal hangt en moje Foto van de bekennte Dichter, Schriever, Padagogen, Politiker, de alltied vullsatt van Ideen, mit de dat Leven van de Minsken in Auerk un heel Oostfreesland wat beter un levensweerter worden is.

Reinhard Former hett denn en Book vörstellt, dat in de DIESEL-Verlag to disse Ehrendag herutkomen is. Dat Book draggt de Titel „Dat mag Jo good gahn“, en Woord, mit dat Diekhoff sien Breven besloot un dat elke Minske to hören kreeg, de hum anreep. In dat Book is en Rieg van Texten ut Diekhoff sien Feer, Gedichten un Geschichten, van Former upnomen un na de Levensparten sorteert. Former hett ok dat Woord vörut schreven. Van Johann Haddinga stammt de Biografie.
Ut dat Book hebben Dr. Hans-Hermann Briese un Carl-Heinz Dirks, mit de tosamen Diekhoff 1992 de „DIESEL – dat oostfreeske Bladdje“ begründt harr, Texten vörlesen. De Tohörers kunnen woll marken, wo hör de Senior-Partner fehlen deit. Theda Schöningh-Kindermann, de Diekhoff in sien lesde Jahren dat Levens-Geleid geven hett, funn Woorden van Dank. Dat Europa-Huus harr ok en gode Gaav vörtostellen. En Gedenk-Book mit all de Texten, de völe Levens-Genoten upsett harren, as Diekhoff an de 3. August 2013 overleden was.

„Dat mag Jo good gahn“, DIESEL-Verlag, ISBN 978-3-934835-19-1
Utgaav in faste Decksels, 336 Sieden, 22,80 €.
Dat Book is in Bookhannel of direkt bi DIESEL to kriegen.