TOP 

Siet Johr un Dag leest een in Tietschriften un Anthologien en Gedicht oder Geschicht vun Manfred Briese. Nu hett he siene Stücken endlich to en Book tohoopstellt. In mehr as 130 Texten is he op de Spoor vun dat, wat dat Leven in uns Tiet utmaakt. Un wat de Minschen ümdrifft.He kickt sik sien Lüüd nipp un nau an, mit jümehr Denken, Föhlen un Doon. Anfangen deit he bi sik sülvst: Lehr eerstmal dien Spegelbild kennen, ehrdat du wat vun anner Minschen vertellst. Manfred Briese vertellt veel vun sik sülvst, man to’n Glück wiest he uns jümmers wedder, dat so’n Leven nich eenfach liekut löppt, nee, dat dor ok de een oder anner Afgrund luert. Un ok dat: Nich all Minschen sünd goot. Gifft ok welk, de kannst nich troen, de sünd afgünstig un de scheert sik blots üm jümehr egen Weg. Faken sünd dat weniger Geschichten, de Manfred Briese vertellt, man he maalt Biller vun Levenslagen. Skizzen, kort un knapp, wo blots dat rutarbeidt warrt, wo dat op ankümmt – un dat is en Kunst. In „Vertell doch mal 2015“ steiht Manfred Briese sien Geschicht „En Spaaß för ganze Keerls“ binnen. Hier is se nu noch mal natolesen. Villicht harr man to de enkelten Texten toschrieven kunnt, woneem de al mal afdruckt worrn sünd.

Manfred Briese: Segg van „Ji“ an dien Spegelbild - Geschichten & Gedichten
Diesel Verlag, Emden 2016, 212 S. ISBN 987-3-934835-28-3

Institut für niederdeutsche Sprache e.V.
Schnoor 41-43, 28195 Bremen, E-Mail: ins(at)ins-bremen.de,
Telefon: 0421 / 32 45 35
IBAN: DE69 2905 0101 0001 1011 04